AZ

AMEA-nın Ədəbiyyat İnstitutu ilə Rumıniyanın Beynəlxalq Mihay Eminesku Akademiyası arasında əməkdaşlıq müqaviləsi imzalanıb

 İctimaiyyətlə əlaqələr şöbəsindən Azia.az-a verilən məlumata görə, mayın 19-da Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda görkəmli rumın şairi, Beynəlxalq Mihay Eminesku Akademiyasının prezidenti professor İon Deakonesku ilə görüş keçirilib.

Görüşdə AMEA-nın prezidenti, Ədəbiyyat İnstitutunun direktoru akademik İsa Həbibbəyli, Rumıniyanın Azərbaycandakı səfiri Vasile Soare, AMEA-nın Azad Həmkarlar İttifaqının sədri siyasi elmlər üzrə fəlsəfə doktoru Sənan Həsənov, Azərbaycan Yazıçılar Birliyinin (AYB) beynəlxalq əlaqələr və tərcümə məsələləri üzrə katibi Səlim Babullaoğlu, Ədəbiyyat İnstitutunun əməkdaşları və gənc elmi işçilər iştirak ediblər.

Tədbirdə çıxış edən akademik İsa Həbibbəyli bugünkü görüşlə müstəqillik illərində AMEA-da ilk dəfə Rumıniya ilə elmi, ədəbi əlaqələrin qurulması istiqamətində addımın atıldığını söyləyib. Qeyd edib ki, görüşün keçirilməsində məqsəd həm professor İon Deakoneskunun yaradıcılığı ilə tanış olmaq, həm də Beynəlxalq Mihay Eminesku Akademiyası ilə əməkdaşlıq müqaviləsi imzalamaqdır.

Akademik İsa Həbibbəyli bildirib ki, keçmiş sovet hakimiyyəti illərində Rumıniyadan ziyalılar, elm xadimləri Azərbaycana səfər etsələr də, bu, daimi xarakter almamış, müstəqillik dövründə isə elmi əməkdaşlıq müqaviləsi imzalanmamışdır. AMEA prezidenti vurğulayıb ki, Beynəlxalq Mihay Eminesku Akademiyası Rumıniyada nüfuzlu qurumlardan biridir  və Avropada da qəbul olunur, dünyanın bir çox elmi təşkilatı ilə əməkdaşlıq edir, hər il poeziya festivalları təşkil edir, kitab və monoqrafiyalar, elmi jurnallar nəşr edir.

Bugünkü müqavilənin Rumıniya ilə Azərbaycan arasında elmi əlaqələrin qurulmasında ilk körpü olacağını deyən akademik İsa Həbibbəyli artıq oxucuların rumın yazıçıların ədəbi yaradıcılığı ilə tanışlığa başladığını, AYB-nin katibi Səlim Babullaoğlu tərəfindən İon Deakoneskunun “Müsahibə” seçmə şeirlər toplusunun Azərbaycan dilinə tərcümə edildiyini diqqətə çatdırıb. Şarin 35 şeirinin toplandığı toplu ilə tanış olduğunu deyən akademik İsa Həbibbəyliədibin yaradıcılığında son illərdə Avropada baş vermiş ədəbi proseslərin əksini tapdığını söyləyib.Qeyd edib ki, professor İon Deakoneskunun yaradıcılığında naturalizmin əlamətləri müşahidə olunsa da, üstünlük təşkil etmir və şair daha çox sürrealizm ədəbi cərəyanında yazıb yaradır.

AMEA rəhbəri rumın ədəbiyyatının görkəmli siması İon Deakoneskunun bu günlərdə AYB-nin “Məhəmməd Füzuli medalı” ilə təltif olunması münasibətilə təbriklərini çatdırıb.

Akademik İsa Həbibbəyli, həmçinin qonağa rəhbərlik etdiyi Nizami Gəncəvi adına Ədəbiyyat İnstitutunun tarixi, görkəmli simaları, fəaliyyət istiqamətləri, eləcə də Türk dünyası, macar, bolqar, Şərq xalqları ədəbiyyatına dair aparılan tədqiqatlardan danışıb. 

O cümlədən qeyd edib ki, bugünkü görüş və imzalanacaq müqavilə Rumıniyada yaşayan türklərin ədəbi yaradıcılığını da öyrənməyə imkan verəcək, tərəflər birgə tədbirlər təşkil edəcək, kitablar, məqalələr ərsəyə gətirəcəklər.

Akademik İsa Həbibbəyli daha sonra qonağa AMEA-nın 80 illik yubileyini əks etdirən xatirə hədiyyələri, eləcə də Məhəmməd Füzuli haqqında Akademiyada işıq üzü görmüş nəşri və “Azərbaycan ədəbiyyatı antologiyası”nı təqdim edib.

Beynəlxalq Mihay Eminesku Akademiyasının prezidenti, şair, ədəbi tənqidçi, tərcüməçi İon Deakonesku çıxışında Azərbaycan Milli Elmlər Akademiyasında olmaqdan məmnunluğunu ifadə edib. O, müasir dövrdə əlaqələrin artıq real hadisələr formasında inkişaf etməsinin əhəmiyyətli olduğunu bildirib,rəhbərlik etdiyi Akademiyanın Nobel mükafatına namizəd vermək hüququ olduğunu diqqətə çatdırıb. İon Deakonesku gələn ilBeynəlxalq Mihay Eminesku Akademiyası tərəfindən Azərbaycandan olan bir şairin Nobel mükafatına namizədliyinin irəli sürüləcəyini söyləyib.

Həmçinin şeirləri haqqında vurğuladığı orijinal fikirlərinə görə akademik İsa Həbibbəyliyə minnətdarlığını bildirib, Azərbaycan dilində çıxacaq növbəti kitabına AMEA rəhbərinin ön söz yazmasını rica edib. Rəhbərlik etdiyi Akademiyanın keçirdiyi festivallar haqqında məlumat verərək gələcək planlardan danışıb,gələn il Azərbaycanda Füzuli-Eminesku festivalının keçirilməsini təklif edib.

O, akademik İsa Həbibbəylinin Beynəlxalq Mihay Eminesku Akademiyası tərəfindən “Mihay Eminesku” medalı ilə təltif olunduğunu bildirib və mükafatı AMEA rəhbərinə təqdim edib.

Həmçinin Rumıniyanın Azərbaycandakı səfiri Vasile Soareyə də Beynəlxalq Mihay Eminesku Akademiyasının qızıl medalını və “Mədəniyyət səfiri” diplomunu təqdim edib.

Daha sonra Rumıniyanın Azərbaycandakı səfiri Vasile Soare çıxış edərək ölkələrimiz arasında diplomatik münasibətlərdən danışıb,elmi, mədəni əlaqələrin daha geniş vüsət alması üçün bu cür tədbirin təşkilatçılarına təşəkkür edib.

AMEA-nın Nizami Gəncəvi adına Ədəbiyyat İnstitutunun direktor müavini filologiya üzrə fəlsəfə doktoru, dosent Mehman Həsənli, professor Gülər Abdullabəyova, filologiya üzrə fəlsəfə doktoru Aytən Rüstəmova və AYB-nin beynəlxalq əlaqələr və tərcümə məsələləri üzrə katibi Səlim Babullaoğlu isə çıxışlarında qurumlar arasında imzalanacaq müqavilənin əməkdaşlıq sahəsində daha səmərəli işlərin görülməsinə töhfə verəcəyini vurğulayıblar.

Çıxışlardan sonra AMEA-nın Nizami Gəncəvi adına Ədəbiyyat İnstitutu ilə Rumıniyanın Beynəlxalq Mihay Eminesku Akademiyası arasında əməkdaşlıq müqaviləsi imzalanıb. Sənədi akademik İsa Həbibbəyli və professor İon Deakonesku imzalayıblar.

Sonda xatirə şəkilləri çəkdirilib.


Seçilən
0
2
azia.az

5Mənbələr