Birləşmiş Millətlər Təşkilatının Liviyada Dəstək Missiyası (UNSMIL) və Prezident Şurası Tripolidə atəşkəs rejimini qorumaq üçün atəşkəs komitəsi yaradıb. SİA xəbər verir ki, bu barədə UNSMIL-in "X" sosial şəbəkəsində bəyanatında deyilir.
“Liviya Ordusunun Baş Qərargah rəisi, general-mayor Məhəmməd əl-Həddadın rəhbərlik etdiyi komitənin yaradılması bütün tərəflərin gərginliyin daha da artmasının qarşısını almaq və öhdəliklərinə əməl olunmasını təmin etmək öhdəliyini əks etdirir”, - nəşr qeyd edir.
Missiya həmçinin “dərhal, daimi və qeyd-şərtsiz atəşkəsə” çağırıb.
Mayın 12-də Tripolidə şiddətli toqquşmalar başlayıb. Yerli Daxili İşlər Nazirliyi şəhərdə Misrata Briqadasının dəstəklədiyi 44-cü Döyüş Briqadası ilə Təhlükəsizlik və Sabitlik Aparatı (SSA) arasında toqquşmaların baş verdiyini bildirib. Gərginliyə səbəb qərargah rəisi Abdelqani əl-Kiklinin öldürülməsi olub.
Vəziyyətin gərginləşməsi fonunda Tripolidə yerləşən Mitiqa Beynəlxalq Hava Limanı müvəqqəti olaraq fəaliyyətini dayandırıb. Planlı uçuşlar Misurata hava limanına yönləndirilib .
Mayın 14-də məlum olub ki, Liviyanın paytaxtında münaqişə tərəfləri atəşkəs haqqında razılığa gəliblər.
