Mayın 19-da İranda ölkə Prezidenti İbrahim Rəisi və digər yüksəkvəzifəli məmurların həlak olduğu helikopter qəzası ilə bağlı yeni detallar məlum olub.
Yenipress.az xəbər verir ki, helikopterin göyərtəsində olan və qəza zamanı həlak olan şəxslərdən biri Təbrizin imamı Məhəmməd Al-Haşimi hadisədən sonra sağ imiş.
Bu barədə məlumatı İranın Fövqəladə Hallar üzrə Təşkilatının rəhbəri Məhəmməd Həsən Nami də təsdiqləyib.
O bildirib ki, imam bir neçə saat həyatda qala bildiyindən onun cəsədi daha az yanmış vəziyyətdə olub.
Belə ki, Haşimi, hətta mobil telefonu ilə Prezident Administrasiyasının rəhbəri Qulamhüseyn İsmailə zəng etməyə də nail olub. Sosial şəbəkələrdə isə Haşimi ilə qəza günü əlaqə saxlanılmasının görüntüləri yayılıb. Görüntülərdə Haşimi təcili yardım avtomobillərinin səsini eşitdiyini deyir. Onunla yanaşı qəzaya düşən digər şəxslərin də həmin an sağ olması ilə bağlı heç bir detal məlum deyil.
