İş mühitində tənqidə rast gəlmək hər bir əməkdaş üçün qaçılmaz haldır. Bu, müxtəlif situasiyalarda, fərqli yanaşmalarla ortaya çıxa bilər. Əsas məsələ isə bu deyil, əsas məsələ ondan sonrakı davranışdır. Çünki tənqid qarşısında atılan addımlar insanın peşəkar yolunu müəyyənləşdirə bilər. Bəs tənqidlə qarşılaşdıqda necə davranmalıyıq ki, bu, iş fəaliyyətimizə mənfi təsir göstərməsin?
Valyuta.az işdə tənqidə düzgün yanaşmağın 6 yolunu təqdim edir.
Şəxsi qəbul etməyin
Tənqid sizin kimliyinizə deyil, gördüyünüz işə yönəlib. Emosiyalara qapılmaq əvəzinə, məntiqi yanaşmaq peşəkar davranışın əsas göstəricisidir. Sakit olun və qarşı tərəfin nə demək istədiyini anlamağa çalışın. Unutmayın ki, hər tənqid sizə özünüzü daha yaxşı görmək imkanı yaradır.
Sakit qalın və dinləyin
İlk anda etiraz etmək istəyə bilərsiniz, lakin bu reaksiyanı nəzarətdə saxlamaq çox vacibdir. Qarşı tərəfə sözünü bitirməyə imkan vermək həm səbir, həm də hörmət əlamətidir. Reaksiyanız nə qədər sakit və nəzakətli olsa, bir o qədər güclü görünərsiniz. Sizə deyilənləri tam dinləmədən müdafiəyə keçmək daha çox zərər verə bilər.
Obyektiv yanaşın və fayda çıxarın
Tənqid sizi daha yaxşı olmağa yönəldə bilər. Fikirlərlə razılaşmasanız belə, onları soyuqqanlılıqla analiz edin. İstənilən geri bildirimdə inkişaf üçün bir mesaj mövcuddur.
Əsas olan həmin mesajı tutmaq və özünüzdə tətbiq etməkdir.
Müdafiəyə keçməzdən əvvəl düşünün
Əgər deyilənlər sizə haqsız görünürsə, əvvəlcə səbəbləri başa düşməyə çalışın. Emosional reaksiya deyil, əsaslı arqumentlərlə cavab vermək daha çox dəyər qazandırır. Mübahisə etməyin, izah edin. Düşünülmüş cavablar sizi həm ağıllı, həm də etibarlı biri kimi göstərə bilər.
Kin saxlamayın
Tənqidə görə inciklik və soyuqluq yaratmaq iş mühitinə zərər verə bilər. Əgər danışmağa ehtiyac duyacaqsınızsa, şəxsi şəkildə, sakit tonda məsələyə aydınlıq gətirin. Münasibətləri qorumaq peşəkarlığın bir parçasıdır. Unutmayın ki, kin saxlamaq keçmişə ilişib qalmaqdır, irəliləmək üçün buraxmaq lazımdır.
Gələcək üçün istifadə et
Tənqid sizə nəyi düzəltməli olduğunuzu göstərirsə, bu artıq bir qələbədir. Cavabınızı sözünüzlə yox, işinizlə göstərin. Davamlı və səmərəli nəticələr sizi avtomatik olaraq haqlı çıxaracaq.
Əsas olan tənqid sonrası atdığınız addımlardır, sizi irəli aparan da məhz budur.
Sərvanə Rəmixanova
